熱火擒鷹鎖定東岸二哥 季後賽首圈遇76人

經過昨日嘅賽事之後,東岸前8排名已全部敲定,熱火成功搶走塞爾特人二哥位置,首圈將遇上76人,避開宿敵紐約人。至於西岸仍然七國咁亂,小牛與雷霆同日皆響勝鼓,所以西岸第2、3號種子誰屬,還要看聽朝常規賽煞科日嘅戰果。

熱火昨日憑「大帝」勒邦占士大發神威攻入34分、10個籃板及7次助攻,加上韋迪貢獻21分,協助球隊以98比90擊敗鷹隊,由於塞爾特人喺較後時間打到加時之後,以94比95僅負巫師,令熱火成功提前成為東岸第2名,而綠軍將以3號種子出戰東岸季後賽。今場賽事亦發生了一段小插曲,熱火老牌中鋒伊高斯卡斯比賽時曾發火,用波擲向柏祖利亞,結果被罰出場。

熱火球員戰罷今場賽事後,均留在更衣室關注巫師對塞爾特人嘅賽事,到綠軍輸波後,「大帝」隨即興奮表示:「球隊今季花了很多努力,能夠奪得第2名實在不易,要知道我哋只係一支新建立嘅球隊。」

西岸排位仲有變數

另方面,東岸前8名次及首圈季後賽賽程已全部確定。不過,西岸前8就仲有機會執位,小牛昨日戰至加時後以98比91擊敗火箭,現時領先湖人半場勝仗,所以西岸二哥位置肯定要鬥到明早常規賽煞科日先知。小牛在煞科日將在主場出戰黃蜂;而湖人則會作客帝王,至於同樣有權提升名次嘅雷霆則會主場對公鹿。(now 678及有線165台周四早上8時直播)

本報綜合報道