政府準備透過「鳳凰計劃」注資本地足運，竟然惹來「太公分豬肉」猜測，不過波男可以話畀大家聽呢個實在係一場誤會，因為波總五十三個屬會絕唔會直接喺政府庫房攞到一分一毫，佢哋只會間接獲得資助，至於其他細節則仍在商議中。
屬會如何獲得資助，點樣善用資源強化球隊運作，方法有好多，其中一種就係類似信用卡簽帳額嘅消費模式，每間屬會獲得若干簽帳額，可以用嚟租場、埋班、籌組梯隊等等，總之一切開支必須用得其所。至於圈內人最關注嘅，就係改革方案點樣真正幫到啲乙、丙組球會生存同發展，有董事提議波總同贊助商每年預留一千萬元預算，畀咁多間乙、丙組球會用作組軍資金，計落每間球會大約可以分到二十萬元嘅營運資助，而只要管理得宜，每間會再自行物色班主或贊助，一人夾啲用嚟埋班，令到即使係低組別聯賽，都可以搞出一片新天。
乙、丙組球會雖然只係業餘波，但一樣有其存在價值，好似英超聯之下仲有英冠、英甲、英乙甚至英非，而英足總就會向低組別球隊提供支援，至於香港嘅乙、丙組，如果每季組軍前已經有一筆備用金打底，運作自然更加順暢，雖然呢筆錢唔可以變成現金，但只要佢哋小心運用，唔好亂使碌爆卡，呢筆資助其實好好使架！
波男