澳洲泳壇一代名將科比退休後進軍商界，奈何投資經驗不足搞到損手爛腳，穀種都幾乎食清光。科比之前決定走回頭路復出泳壇，希望贏番啲獎金再戰商界。點知澳洲泳總唔畀面，未有選佢入澳洲代表隊，意味着今年喺上海舉行嘅世錦賽唔使預佢。其實科比好想同美國「飛魚」菲比斯一較高下，以一場「世紀對決」去重振聲威，如今好夢幻滅，可謂黑過墨斗。
相反菲比斯就喺泳壇一帆風順，最近佢就喺美國密歇根游泳大賽中，一日內連奪二百米自由泳及一百米蝶泳兩面金牌。科比同菲比斯各走極端，都唔知幾時至睇到佢哋終極決戰。