高比牛油手恐斷送湖人西岸冠軍
力爭西岸頭號種子嘅馬刺與湖人，尋日可謂命運迥異，馬刺以97比90擊敗鷹隊取得兩連勝，相反湖人就有「戰神」高比拜仁在最後關頭「牛油手」失誤，錯失絕殺機會，令「紫金兵團」以85比86僅負爵士。現時馬刺已領先湖人3.5場勝仗，奪得西岸常規賽冠軍機會高唱入雲。
湖人尋日在主場迎戰賽前已8連敗，兼肯定無緣季後賽嘅爵士，本以為只係一項簡單任務，殊不知呢舊魚腩原來有骨。賽事在最後1分多鐘掀起高潮，高比拜仁連入兩個三分球，在最後16秒為湖人追成平手，不過爵士其後有新秀希禾特兩罰中一再度領先。湖人最後一擊落於領袖高比拜仁身上，殊不知身經百戰嘅佢跳投竟然甩手，未能完成最後一擊，湖人最終以85比86飲恨。
馬刺獵鷹稱王在望
湖人不敵爵士後兩連敗，總成績為55勝22負，由於馬刺同日以97比90擊敗鷹隊，總成績亦去到59勝19負，大幅領先湖人3.5場勝仗，湖人想後上衞冕西岸常規賽冠軍，已經非常渺茫。
湖人眾將今場手風欠順，全隊投射命中率未達四成，高比拜仁18次起手僅中6球得20分。雖然輸波，但高比仔亦不失風度，賽後更大讚緊纏佢導致「牛油手」嘅新人希禾特：「佢打法好全面，我會形容佢為更具潛質版嘅漢拿錫！」而爵士爆冷贏波後，亦結束作客湖人連輸17場嘅噩夢。
至於馬刺擊敗鷹隊之後，教練普波維治獲得馬刺生涯第795場執教勝仗，追平「紅衣主教」奧爾巴治，並列NBA史上單隊勝場紀錄第二位，第一位係贏得1127場勝仗，在今季離開爵士嘅前教練史龍。