香港喺二○一四年巴西世界盃抽到下下籤，將與曾四度參加決賽周嘅沙特阿拉伯爭出線權，如果冇奇迹出現嘅話，香港踢完主、客兩回合外圍賽就正式畢業，世盃夢又要等多四年！
波男唔係馬後炮，其實喺未抽籤之前，波男已認為沙特阿拉伯喺第二輪外圍賽中，係香港有機會遇到嘅最強對手，點知真係咁唔好彩撞正。當然，波係圓嘅，香港近年國際賽有唔少佳作，即使對住沙特都未必輸硬，但作為全球最高榮譽嘅賽事，只係靠兩場波定生死，會唔會兒戲咗啲？
睇番歐洲區外圍賽，就算你係魚腩聖馬力諾、盧森堡或安道爾，最少都有十場波踢，就算冇機會出線都好，起碼都可吸收吓經驗，賺吓門票收入，但亞洲區呢？好似香港呢啲高不成、低不就嘅球隊，就成為被遺棄嘅一群，隨時踢完兩場就畢業，人生苦短，職業球員嘅生涯更有限，亞洲足協係咪應該檢討吓現行嘅制度呢？
唔講其他洲，淨講亞洲嘅U19同U16賽事，初段都係以分組賽形式舉行，雖然係會有啲強弱懸殊嘅比賽出現，但你唔畀機會弱隊踢多啲比賽，又點提升佢哋水準呢？即使亞洲足協想避免賽事欠競爭性，大可以分組賽形式，安排弱隊互相對壘，總好過依家咁，一埋牙就踢淘汰賽咁殘酷啦！
波男