改革本地波引發球圈「分餅仔」問題，據說掌握大多數票嘅部分乙、丙組會員準備投反對票，呢件事近日喺各討論區群情洶湧，網民將矛頭指向反對改革人士，令事情逐步走向危險境地。
好在距離投票仲有半個月，波總仍然有時間做拉票同游說工作，搵出乙、丙組有何不滿之處，點樣拆解，過程中彼此多啲尊重，大家對足運有所承擔，事情仲有得掹。
改革內容涉及政府未來將有巨額注資，仲會喺場地設施同營運上提供大量資源協助，因此若然只係「分餅仔」，事情就好辦，波總要做嘅，當然唔係同五十三個屬會分錢咁簡單，而係要同各屬會做好溝通，方便行事。
乙、丙組做咗屬會咁耐，改革唔預埋佢哋，情理上係講唔通，嗰班外國顧問唔知道香港球圈係由乙、丙組控制，冇諮詢過佢哋係好正常，呢件事由波總自己補鑊亦係好應該。
至於講到「畀面」問題，改革建議將現有嘅會長升格為「永遠會長」，但不予投票權，呢件事就有啲阿茂整餅嘞。球圈人士都知，波總會長係負責同政府高層及外國波總官員打交道，好少理會波總內部事務，亦甚少行使投票權，佢唔投票係一回事，剝奪佢嘅投票權就係另一回事！
波男