香港嘅精英體育政策係「有獎牌有水，冇獎牌冇水」，波總惟有將全副精神放晒落下屆東亞運同亞運身上，但原來喺呢個評核制度下，即使強如英格蘭同葡萄牙都無法達標，好彩朗尼同C朗唔係生於香港，否則佢都唔知點算！
係人都知英格蘭球星如雲，但國際賽戰績就一舊雲，如果採用香港嘅精英計分法，其下場就好大鑊，三年前未能打入歐國盃決賽周，舊年喺世盃十六強出局，體院嘅評核係由大賽八強先開始計分，所以英格蘭喺上述兩項賽事都係零分！
至於青少年賽事，好彩英格蘭喺上屆U21歐國盃殺入決賽，雖然畀德國大炒四蛋，總算攞到亞軍，獲得一面銀牌，喺體院評核就得到5分！
體院評分嘅最低標準，係計算該項目嘅成人同青少年賽事總得分，最少要有9分先至達標，好嘞，英格蘭都係得5分，港足09年奪得東亞運金牌都有4.5分，港足與英格蘭竟然係同級！
再計葡萄牙，原來佢哋都唔夠分，葡萄牙喺世盃十六強出局，歐國盃打入八強，有4.5分，但上屆U21歐國盃入唔到八強，所以冇分，即係同香港一樣只得4.5分，同英格蘭同一Level咋！咁C朗同朗尼兩兄弟萬一唔好彩流落香港，仲想揸靚車溝女住大屋？食懵你喇！
波男