本年度F1（一級方程式賽車）首站賽事澳洲站周日喺墨爾本上演，擁有輝煌戰績嘅法拉利車隊今年有新搞作，就係聘請意大利國家空軍特技表演隊指揮官加盟，用意係提高車隊嘅應變能力同比賽策略，準備同紅牛及麥拿侖等勁敵打硬仗。
意大利國家空軍特技表演隊外號「三色箭頭」（Frecce Tricolori），指揮官塔馬羅最近離開表演隊，法拉利車隊立即招攬佢加盟，車隊負責人多蒙尼卡利表示：「塔馬羅係一位出色嘅指揮官，具備軍事經驗，佢對車隊會有好大貢獻。」法拉利上季連番戰術失誤，首席空氣動力學專家戴爾黯然離職，換來一位空軍指揮官，實行將賽車場當成戰場！
澳洲站練習已經開始，各車手喺周五亮相，紅牛車隊嘅韋伯、維度爾，麥拿侖車隊嘅畢頓同咸美頓都造出快時間，但係車隊HRT Hispania就倒瀉籮蟹，架車仲未整好未能落場試車，佢哋車隊仲用咗一次通宵整車機會，新條例規定每隊一季之內只容許四次通宵整車，賽季未開始已經搞成咁，呢支HRT Hispania今季都有排捱。（now 671今午1時50分直播排位賽）