由今日開始到星期日，大球場每日有三萬幾四萬人睇波，場內到處人頭湧湧，見到咁嘅場面，入場前當然要早啲Plan定行程，事關場內有好多必玩同值得留意嘅活動，例如今年特備節目，就有靚女組合Blush演出，正所謂入得嚟玩，梗係要盡興！
入場之後，最好就立即買番本場刊傍身，有晒球隊介紹同賽事時間表，入口附近有好多嘢玩，可以先去髹面攤位畫個大花面，跟住買港隊紀念Tee，仲有去詢問處安排大螢幕留言，向朋友表達訊息。
係欖球迷都知，南看台係「兵家必爭之地」，嗰度係全場玩得最癲最喪最盡情嘅地方，有一半以上球迷係Cosplay，亦係裸跑「出閘」嘅熱門地點，不過座位有限，通常開波後一小時就會爆滿，輪候時間長達四、五小時，所以大家諗住殺入南看台，就要早啲到嘞。
至於追星族想同心儀球星近距離接觸，一樣有計，大會喺西翼主層132及133段設立簽名區，想攞簽名記得喺嗰度捕住。
為進一步提高氣氛，大會安排來自英國嘅美女啦啦隊喺場內四處出沒，而女子組合Blush更會喺周日決賽前進行表演。
講到熱門歌曲，當然仲有呢首：「Hey Baby, I wanna know if you'd be my girl」，大家玩得開心啲啦！
髹面服務：場內主層攤位
購買場刊：北翼入口攤位
大螢幕留言服務：北翼入口詢問處
購買港隊紀念品：場內主層攤位
簽名區：西翼主層132段及133段
南看台輪候處：西翼121段及東翼113段