麥珮軒壁球大長今
如果覺得睇中醫「老餅」，這種想法未免太Out，其實中醫藥已經成為一股潮流文化，它不但可治病，很多年輕一族更以它作為減肥、養顏、保健的養生良方，前香港壁球名將麥珮軒（ＣＭ）就是因為起初「愛美」及「病痛」的關係而接觸並愛上中醫，目前在中文大學攻讀中醫中藥學士學位課程的她，心善如「大長今」，她希望將養生之道推廣普及，深信每個人「健康啲」，自然就會「變靚啲」。
ＣＭ○九年與趙詠賢、陳浩鈴等協助香港奪得東亞運動會七面金牌後，正式退役並為未來重新規劃，雖年逾三十，但堅決再踏校園。去年成功獲得中文大學接納的她坦言放下球拍，重拾書本之過程困難重重：「坦白講，幾開心o架，一星期五天都返學，但始終放低書本十幾年，而且仲要長時間專注聽書，起初真係唔慣，好彩做運動員時學得堅持，依家就用得着喇。」
自身經歷才知中醫實用
既然是運動員出身，很多人都奇怪為何ＣＭ不選擇自己「內行」的體育或者一些容易「搵錢」的課程而選擇讀中醫，她稱：「有些朋友都覺得奇怪，因為課程為期五年，加上我依家要讀一年基本課，即係六年後才可以考執業試。其實當初自己是因為胃病，周圍搵醫生都睇唔好，最後因為食中藥好番，後來繼續有留意，食啲乜可以健康啲，或者可以後生啲，慢慢對中醫嘅興趣愈來愈大。」
當然，能夠懸壺濟世是麥珮軒的發憤目標，而她攻讀中醫的終極目標是「如何令人健康快樂生活」，她感觸地說：「隨着自己年齡漸大，加上父母、親友都有出現生老病死問題，令我希望回饋社會，將在中醫學到的推介出去，讓每個人更健康……」
儘管已脫下職業運動員戰袍，但ＣＭ仍心繫體育：「作為運動員，多年來我知道運動對人體有好影響，亦有壞影響，我希望用中醫嘅養生方法為運動員延長運動生命。」
捐08年奧運火炬賑災
ＣＭ在體壇一向甚為低調，但本身是個愛心天使，還記得○八年汶川地震，作為當時北京奧運聖火香港區傳遞代表之一的她，率先捐出火炬及其他裝備拍賣賑災，她所捐出的火炬放在金鐘香港壁球中心大堂，供市民欣賞。
麥珮軒小檔案
年齡：33歲
代表香港：95年－2010年3月31日
最高世界排名：31(07年7月)
威水史:
09年東亞運動會團體金牌
06年多哈亞運會銅牌
圖、文：李芷韻、Carrie