「銀河艦隊」皇家馬德里闊別神州六年後，落實喺今夏再度訪華，前赴廣州同天津兩地踢表演賽，據講今次戲金高昂，兩站賽事盛惠六百萬歐元，折合港紙係六千六百萬元，相當乸脷。
皇馬曾於03及05年兩次拉隊嚟亞洲，其中03年嗰次更全隊嚟晒香港，哄動全城，而皇馬訪港亦成為香港一件歷史大事，但波總卻負上安排失當之名，遭市民圍插。
當年波總畀人鬧得最甘嘅，就係門票分配不均同戲金太貴，皇馬戲金係破紀錄嘅二千萬港元，開咗呢個先例，自此香港每次搞外隊對方都獅子開大口，事關人哋以為香港人豪得起，但實情係當時沙士完咗後要幫市民打氣，自從皇馬訪港後，八年來香港搞外隊都未試過爆棚。
皇馬05年訪華目的地係北京，據講嗰場表演賽戲金係再破紀錄嘅六百五十萬歐元，折合超過七千萬港元，大家試想像一下，如果皇馬收呢個價錢嚟香港踢波，可容納四萬人嘅大球場，平均票價要推高到一千八百蚊先至唔使蝕。
皇馬今次由C朗孭飛到訪中國，兩場索價六百萬歐元，首站八月三日去廣州對廣州恒大，八月六日再喺天津對天津泰達，想再請皇馬訪港就冇乜可能o架嘞，香港球迷想睇皇馬，近近哋可以上廣州睇嘅。
波男