晨曦破四海闖4強
晨曦終打破「四海魔咒」！上兩屆足總盃均被四海流浪淘汰嘅晨曦，昨日一掃頹風，在黃鎮宇、巴利各建一功及對手擺烏龍下，以3比2擊敗四海流浪，打入四強後將與南華或公民爭決賽權。同日新界地產和富大埔以4比0大勝屯門，四強對手會係天水圍飛馬或大中。
昨日兩場賽事移師青衣運動場舉行，吸引696人入座。頭場晨曦火併四海合演入球騷，四海於22分鐘憑馬高遜禁區頂勁射「世界波」破網領先。四海其後換走沒傷病嘅日本外援深澤仁博，給予晨曦反撲機會，完半場前由黃鎮宇及巴利建功反先2比1。76分鐘四海中堅姚韡擺烏龍，晨曦領先至3比1，末段李鍵為四海追回一球，晨曦最終贏3比2殺入四強。
黃鎮宇破兩年入球荒好激動
晨曦能夠反勝四海，季中回巢嘅黃鎮宇功勞不少，被隊友尊稱為「宇哥」嘅佢，不時大聲提場：「咁踢咪得囉、畀入去吖嘛」，當佢為球隊追和1比1後更激動到「怒」踢場邊廣告板，比賽期間佢並多次向球證投訴，猶如當年嘅李健和「上身」。
「宇哥」賽後表示沒有刻意效法「和哥」，只係心中仍有團火，要繼續踢下去，原來佢對上一個甲組入球已係兩年前：「其實我每次落場都想入球，只有保持這份鬥心，比賽才有推動力。」
至於尾場嘅「新界打吡」，大埔開賽15分鐘已由葉佳及陳立明各建一功，下半場屯門有美高2黃1紅被逐，大埔再於末段靠安基斯梅開二度，以4比0大勝。
