火箭爆破綠軍 季後賽未絕望
【本報綜合報道】同日嘅火箭喺主場爆出大冷，以93比77輕取塞爾特人，取得3連勝，不但打破6年來主場對「綠軍」全敗嘅魔咒，並重現打入季後賽曙光。今仗充滿火藥味，兩隊甚多「埋牙」場面，更差啲出現群毆，幸好雙方球員克制，冇出現不愉快事件。
火藥味濃幾乎開拖
兩隊首次衝突主角係加納特同希斯，當時塞爾特人主將加納特同火箭嘅希斯撞埋一齊，之後兩人互有動作，最後被雙雙吹罰技術犯規，半場前格連戴維斯再同希斯發生碰撞，格連戴維斯被摔出底線外，起身後即刻「兇」希斯，被球證判罰技術犯規，此舉令「綠軍」球員非常不滿，好彩當時半場時間到，淋熄咗雙方嘅怒火。
雖然綠軍咁落力，但火箭半場已領先22分，去到第4節已成為垃圾時間，最終大勝16分，火箭今場表現最搶鏡係奇雲馬田，佢取得全場最高嘅25分。火箭贏波後，戰績比西岸第8位嘅灰熊只係贏少1場，剩番最後12場常規賽，火箭仍有機會搭上季後賽尾班車。