元朗大球場今日上演足總盃兩場八強賽事，衞冕嘅天水圍飛馬迎戰弱旅大中，預料可輕鬆過關；壓軸戲公民火併南華，亦係兩隊今季第四度交鋒，公民將強陣出擊，剛喺亞協盃慘敗嘅南華能否及時振作，將會係今場勝負關鍵。
公民喺今年初銀牌決賽奇迹反勝南華後，會方向球員豪派近百萬元獎金獎品，並揚言要好事成雙，再取足總盃，兩星期前雙方在聯賽次循環交鋒，公民以一比二敗陣，教練貝可泓指該仗賽果不能作準：「當時我們只是試陣，亦收起一批主力，今仗我們會沿用銀牌決賽戰術，由中場開始壓迫對手。」
南華周中於亞協盃作客泰國春武里慘吞三蛋，正陷信心危機，畢特與基士文雙雙正選登場嘅不勝走勢增至五場。貝可泓直言無意改變戰術應付「畢基組合」：「南華近況一般，信心似乎有點回落，我也不會刻意為畢特及基士文作針對部署，只要我們踢出正常水平，很有信心可再次贏波。」
至於頭場戲碼可謂強弱懸殊，剛於亞協盃主場輸波嘅飛馬，今仗有前鋒高梵及後衞利偉倫停賽，中場陳柏良又被中華台北徵召而缺陣，陣容不整，幸好對手只係實力一般嘅大中，賽事又安排喺元朗舉行，相信飛馬可在主場輕鬆晉級。
下午2:00 : 天水圍飛馬 Vs 大中
下午4:30 : 公民 Vs 南華
地點：元朗大球場
票價：$60、$20（特惠票）
*90分鐘賽和將加時30分鐘，再和則互射12碼決勝。