公牛王朝再現！做東岸一哥冇佐敦後首次

易建聯重任巫師正選交到貨

戴歷羅斯似對拍檔缺陣習以為常，大前鋒布沙仍未傷愈，而諾亞賽前就因流感而休戰。雖然公牛缺少兩大猛將，但實力仍在巫師之上，完結三節後公牛已領先15分，最終賽事提早進入垃圾時間，公牛大勝19分。戴歷羅斯獨取23分，另外交出7次助攻及2次搶截，至於另一主將鄧格就貢獻20分。

公牛在常規賽連勝7場後，總成績達到48勝18負，成功力壓塞爾特人榮登東岸榜首。公牛對上一次成為東岸一哥，已要追溯到97至98球季，亦即係「波神」米高佐敦効力嘅最後一季。

至於巫師，今場已係佢哋今季第30場作客敗仗，但易建聯就因為多名主力受傷缺陣下，事隔三個月後重返正選。阿聯上陣多達41分鐘，攻入14分及搶得6個籃板，但同時亦因為怒吼球證而被罰NBA生涯第二次技術犯規。