加納特家醜外揚被喪插
塞爾特人老將KG加納特風流成性，多番被狗仔隊踢爆背妻偷食金髮美女Krissy Freiberg，原本其太太巴蘭迪都諗住扮唔知，點知一對偷食男女愈來愈高調，Krissy仲獲得加納特送贈季票及自由出入「綠軍」更衣室，二奶變大婆，巴蘭迪忍無可忍終同Krissy開拖！
04年與巴蘭迪拉埋天窗嘅加納特，08年已被狗仔隊踢爆偷搭前木狼啦啦隊員Krissy。雖然背妻偷食，但加納特毫無避忌，不時都被傳媒影到親密合照，令二人關係愈見公開。正室巴蘭迪都知老公爛滾，但基於兩人育有一女，所以一直冇干擾個「衰佬」同Krissy來往，自己啞忍算數。
不過，Krissy近期愈來愈得寵，獲得加納特送贈前排季票入場睇愛郎比賽之餘，仲有特權可以自由進出塞爾特人更衣室，得以無時無刻同加納特談情。結果巴蘭迪忍無可忍，在上星期塞爾特人對快艇嘅賽事，入更衣室大興問罪之師！據在場人士透露，巴蘭迪毫不留情怒踢Krissy，而大部分在場人士都支持巴蘭迪，全因第三者搶人老公始終唔啱。
塞爾特人不敵籃網
事件爆出後，加納特難免成為被插對象，唔少網民都指佢冇本心。而佢尋日亦未能協助球隊贏波，雖然KG攻入18分，但朗度同皮雅斯都失準，最終塞爾特人以79比88爆冷不敵籃網。
本報綜合報道