另一邊廂，熱火周五對手湖人卻狀態大勇，尋日作客以一○一比八十七擊敗鷹隊，平咗球隊今季最長連勝紀錄八連勝之餘，主將高比拜仁更創得分生涯里程碑，超越名宿摩西斯馬龍，進身NBA史上累積得分第六位。
高比拜仁今場取得二十六分、六個籃板及四次助攻，令職業生涯總得分達二萬七千四百二十三分，超越名宿摩西斯馬龍，成為史上得分第六高嘅NBA球員，第五位則係前湖人隊友奧尼爾，賽後高比仔謙虛表示，能夠超越前輩紀錄只係幸運。
今場湖人贏得相當輕鬆，第三節已將比數拉開，除高比仔外，其他隊友加素、拜林、費沙及奧當都有好表現，輕輕鬆鬆就取得八連勝，其中以拜林最搶鏡，今仗十投八中弗到爆，近三仗合共取得五十個籃板同埋十九個封阻，攻守兼備，難怪高比仔話以拜林近期嘅狀態，湖人衞冕機會相當高。