罷操事件遭活塞雪藏
麥基迪今季轉投活塞後，表現已經好番好多，就好似上月尾對溜馬，個人就取得「雙雙」16分及12個籃板，仲有正選打添。只可惜活塞其後爆出球員罷操事件，而「T-Mac」就係其中一分子，自此以後麥基迪就１分鐘都冇出過，擺明畀球會懲罰放入雪櫃。
老實講，麥基迪罷操受到懲罰好合理，如今公開抱怨球隊，只會更難走出雪櫃，睇怕佢季後離隊嘅機會都會高唱入雲。不過，其實麥基迪留喺活塞都好難有發揮，倒不如收吓啲脾氣，加盟公牛或者塞爾特人等爭標分子，食番個尾胡仲好！公牛現時最缺乏就係遠投好手，麥基迪過檔應會有所作為。