今年銀牌最大看點，肯定係連續三年捧盃嘅南華，能否史無前例地取得四連霸。阿裕當然唔會畀佢哋咁做啦，永倫對上一次贏得銀牌冠軍，已經要追溯到02年，我哋失落咗銀牌咁耐，一眾兄弟賽前都充滿鬥心要重奪冠軍，永倫將會係南華破紀錄嘅最大障礙。
阿裕今年已經36歲，身體亦愈見不勝負荷，有時訓練都覺得幾辛苦添！所以阿裕今季亦有一個新角色，就係兼任永倫助教一職，希望將十多年比賽經驗灌輸給年輕球員，而自己就好似NBA名宿如籃網教練艾華利莊遜等，先由助教做起，到有機會就嘗試當主帥，延續籃球事業。其實有興趣人士都可以到籃總報讀一些教練課程，話唔定你可以成為下一個「禪師」！
有線NBA評述員蔡芳裕