杜域侯活突破7000籃板
出道以來屢破籃板球紀錄嘅「魔獸」杜域侯活，昨日面對紐約人又再創下另一里程碑，侯活搶下生涯第7000個籃板球，超越名宿張伯倫成為最年輕「7000籃板先生」！「魔獸」今場稱霸籃底，貢獻「雙雙」協助魔術以116比110反勝紐約人，常規賽3連勝。
成就超越張伯倫
魔術今仗都算贏得驚險，第２節大失準下，單節落後作客嘅紐約人22分，而客隊亦因此在完上半場後坐擁11分領先優勢。不過魔術在下半場積極反擊，尼爾遜更在第４節爆發助球隊反勝116比110，魔術自一月後首次取得３連勝。杜域侯活今場打出內線霸者本色，無懼史杜迪米亞來犯，為魔術貢獻「雙雙」30分及16個籃板球，而尼爾遜就轟入26分。經過今場賽事後，「魔獸」生涯籃板數字已累積超過7000個，成功以25歲83日超越名宿張伯倫，成為史上最年輕「7000籃板先生」。魔術教練雲根迪賽後表示，唔明白球迷點解只談論戴歷羅斯及勒邦占士攞MVP，反而冇人提及過杜域侯活。
梅菲將加盟綠軍
另方面，據《ESPN》報道，勇士已經買斷大前鋒梅菲嘅合約，後者被多支球會垂青下，最終揀選加盟「綠軍」塞爾特人。至於熱火亦已經裁掉控衞阿羅約，為收容老將碧比做好準備。
本報綜合報道