同比立斯A米組三巨頭 安東尼做紐約人

為免步騎士失去勒邦占士而一落千丈嘅後塵，金塊近月一直為無意續約嘅「甜瓜」安東尼找新東家，但由於「甜瓜」表明非紐約人不續約，所以金塊最終亦只能接受後者報價。今次「甜瓜交易」牽涉3支球隊合共12名球員，紐約人從金塊獲得安東尼、比立斯、舒頓威廉士、安東尼卡特及巴克文共5名球員。

不過，紐約人在這宗交易代價絕對不菲，球隊將三名正選費頓、加連拿利及莫斯哥夫送往金塊，還有韋遜贊特拿與2014年首輪選秀權，以及早前從勇士換來嘅2012及2013年次輪選秀權，再另加300萬美元，才令金塊首肯。紐約人同時將艾迪居里及安東尼蘭度夫送到木狼，並從木狼身上換得哥利比華。

「大帝」將做第三任老竇

主角安東尼對能夠返回家鄉効力感到高興，並指今次決定係佢一生人最明智嘅選擇，肯定唔會後悔。事實上，「甜瓜嫂」正在紐約工作，安東尼加盟紐約人後，將會更多時間與太太及家人見面。不過，由於紐約人嘅15號戰衣已經退役，《DIME》雜誌記者就收到消息話「甜瓜」會改着13號。

另方面，「大帝」勒邦占士證實將會第三度任爸爸，其女友近日「現肚」照曝光，兩人此前已育有兩子。