神二代閃耀明星賽
兩個最接近「神」嘅男人高比拜仁與勒邦占士，尋日進一步貼近「波神」米高佐敦。高比拜仁於第60屆全明星賽中轟入37分，最終在「地頭」洛杉磯協助西岸明星隊以148比143擊敗坐擁「七巨頭」嘅東岸明星隊，賽後如願第四度獲得MVP，超越「波神」並與名宿佩蒂特並列為明星賽MVP次數最多球員。雖然勒邦占士未能領東岸衞冕，但佢今場造出「三雙」，則屬米高佐敦後史上第二人。
自從將號碼改成24號之後，高比仔已經向全世界表明野心，佢並唔想做甚麼佐敦接班人，而係要超越飛人，成為NBA永恒波神。高比仔在今屆明星賽較任何球員都要認真，皆因佢想盡快超越佐敦在明星賽嘅各項紀錄，而佢坐擁主場之利下亦手風甚順，26次出手中14球，轟入37分並搶得14個籃板，兩項數據都屬於高比仔在歷屆明星賽新高。而高比今場搶下10個進攻籃板，亦刷新了明星賽紀錄。
高比轟37分 西岸封王
結果高比仔與杜蘭特輪流飆分下，領西岸由頭帶到尾贏148比143，重奪失落一屆嘅錦標。高比仔賽後第四度當選為明星賽MVP，超越米高佐敦與死敵奧尼爾（各三次），與名宿佩蒂特並列為明星賽MVP次數最多球員。此外，高比仔亦成為13年來首位明星賽票王＋MVP，而對上一次能夠做出此成績，正正就係米高佐敦。經過今場賽事後，高比拜仁在明星賽累積得分已達到244分，升上史上第四位，只要「戰神」能於往後嘅明星賽中再入19分，就可以超越榜首嘅米高佐敦，成為明星賽得分王。
大帝寸宿敵獨沽一味
除高比仔力圖超越「波神」之外，勒邦占士亦以表現來證明身價，「大帝」今場為東岸交出29分、12個籃板及10次助攻嘅「三雙」數據，係自97年米高佐敦後，NBA史上第二位球員能在明星賽中食出「大三元」。雖然輸波兼失落MVP寶座，但「大帝」認為「三雙」已經證明自己嘅全面性，無論得分、防守、籃板及策劃都能夠完成任務，呢種就係勒邦占士式籃球。當被問及敵人高比拜仁時，「大帝」則語帶諷刺指佢每天都在不斷得分，明顯不及自己全面。
本報綜合報道