上屆北京奧運，波總幾位話事人斥巨資成立「香港08」參加甲組聯賽，之後再由華家堡同東方接力，吸納適齡奧運腳繼續培訓，雖然港隊喺奧運外圍賽出局，但亦造就前年東亞運奪金及去年亞運嘅好成績。
足球圈常規係種瓜得瓜，搞青訓更係極長線投資，冇番三五七年未必有收成，回報期就更可能長達十年八載，其實喺「香港08」之後，波總亦成立過「香港09」同「香港C隊」等，可惜遇上財困令精英梯隊爛尾，今屆奧運外圍賽雖然已經提早備戰，但球員欠缺類似「香港08」嘅磨練，效果總係差啲。
奧運外圍賽只限廿三歲以下球員參加，近兩年取得好成績嘅東亞運及亞運功臣，大部分已經超齡，踢過上述兩項大賽嘅只得葉鴻輝、歐陽耀冲、曾錦濤及阮健文，其餘大部分球員只得一至兩季甲組經驗，今季先至喺甲組亮相嘅夏志明同周綽豐，已經要代表香港出征。
奧運隊即將亮相，同馬爾代夫爭晉級資格，波男祝願呢班小將好好表現自己，為港爭光，踢得好固然要嘉許，就算成績唔好，希望廣大球迷體諒佢哋。雖然政府已承諾開水喉打救香港足運，但遠水救唔到近火，今屆奧運外圍賽，波總同港足都要靠自己去解決困難。