巴西傳奇球星朗拿度淚別球壇，去到終極大結局朝偉上身狂騷演技，拋出韓劇式催淚橋段揭露自己暴肥真相，原來「大哨」因為患病先會變「肥哨」！大家一直錯怪呢位外星人！一個好劇本，幾滴眼淚，朗拿度突變悲情球星，一洗爛滾蒲精負面形象，為退休生活鋪定康莊大道，高手！
喺召開記招宣布正式收山前，「大哨」形象負面，作為球員，肥到好似有咗幾個月身孕仲學人踢波，唔專業；作為丈夫同父親，背住妻兒夜夜笙歌拈花惹草，正賤Man！不過，記招過後一切逆轉，朗拿度因病暴肥哭別球壇廣為各大傳媒報道，經過洗腦式宣傳，成為球圈中人熱話，獲大批球迷奉上無限同情及惋惜。
大結局上演後，朗拿度形象好轉，雖然召妓召錯人妖污點永不磨滅，但至少仲有人為呢位球星離去而哀悼。千祈咪睇小場戲啊，「大哨」一身兒女債，有四隻化骨龍要養，呢位球星動作多多，有傳想爭做哥連泰斯會長，又要踩入商場搞公司搵真銀，如果個人Image唔掂，搞乜都事倍功半，依家外界反應唔錯，總算求仁得仁啦。
朗拿度今次洗底成功，各大傳媒功不可沒，至少大部分媒體都以正面態度報道，只得小部分人繼續大搞惡趣味，球壇一代巨星收山之時仲拎七料影帝扮「大哨」套陳年舊戲出嚟玩，真係得啖笑！
波男