每年到呢個時候就要開始為聯賽計數，今季波總編排賽程確有一手，聯賽各隊同步進行，由依家至季尾，每隊剩番幾場波，今季聯賽錦標不出傑志同南華兩隊，雖然現時排榜首嘅係傑志，不過佢哋捱唔捱到季尾就好難講咯。
聯賽盃準決賽證明，號稱「港版巴塞」嘅傑志一踢雨戰就投降，呢方面真係要檢討，事關嚟緊三至五月相信仲會有唔少落雨機會，例如四月初再對少林寺，若然又係一場水戰，人哋淨係斬波都斬瓜你。
今年嘅聯賽冠軍比任何一季都重要，皆因勝出球隊既可獲得亞協盃資格，仲可以參加七月嘅英超巴克萊錦標賽，因此呢兩張入場券真係爭崩頭，點樣踢好剩番嗰幾場聯賽，先至係今季成敗嘅最大關鍵。
南華陣中有成廿六、七個球員，包括畢特同基士文坐鎮，人腳多到直情可以分成兩支球隊，下半季嘅目標一定係橫掃所有冠軍。
波男再細心分析，南華兩線作戰簡直係魔鬼賽程，例如三月中足總盃對公民，三月底聯賽盃決賽對飛馬，四月初聯賽榜首大戰對傑志，至於亞協盃，南華嘅對手係印尼、印度同泰國嘅球隊，分組賽由三月初開波踢到五月中，啱啱同聯賽最後衝刺檔期重疊晒。
其實睇真啲，傑志喺聯賽盃輸畀南華未必係壞事，失咗呢個盃仔，佢哋大可以專心備戰聯賽，同時又直接加重對手嘅賽程壓力，傑志若然再去盡啲，連足總盃都Hea住踢，只要贏到今季聯賽，咁就乜都返嚟啦！
波男