屯門鄧肇堅運動場今午上演大戰，南華簽入畢特與基士文兩位球星後首次離開大球場比賽，在聯賽作客屯門，屯門為迎戰「少林寺」，特別將正價門票減價至四十元，而包括特惠票在內嘅所有門票已喺開賽前夕售罄，比賽宣布提前爆棚。
南華上仗喺聯賽盃贏傑志4比2後，球員信心盡復，梅開二度嘅基士文同陳肇麒已建立一定默契，至於中場畢特，就要同隊長李海強爭位。南華目前喺聯賽仍落後榜首嘅傑志一分，再無失分空間，今仗必須擊敗屯門。
今場係屯門今季第三次對南華，聯賽首循環佢哋悶和南華○比○，聯賽盃8強以一比四敗陣，今場回師主場，佢哋嘅塞爾維亞軍團迎戰「鄉里」基士文，乃係賽事另一賣點，可惜隊長美亞及黃志聰停賽無緣上陣，令屯門搶分機會大為削弱。
同日傍晚喺元朗大球場上演另一場甲組聯賽，由天水圍飛馬主場迎戰四海流浪，雙方今季兩度交手均由飛馬獲勝，飛馬有主場之利，可望再勝一仗。
屯門 Vs 南華
時間：3:00pm
地點 : 屯門鄧肇堅運動場
所有門票售罄
飛馬 Vs 四海
時間：6:00pm
地點 : 元朗大球場
票價 : $60、$20(特惠票)