【本報綜合報道】今年3分投射賽同樣充滿話題性，皆因剛在今季打破名宿米拿紀錄，榮升為NBA史上「3分王」嘅雷阿倫將會參賽。剛於今月成為NBA史上投入最多3分球球員嘅雷阿倫，難免成為今屆3分賽焦點，Ray Gun賽前表示唔會因為被睇好而有壓力，畢竟明星賽只係表演賽，佢會以平常心面對，更加唔會作出任何特訓，因為球隊操練已包括3分球練習。
雷阿倫對上一次奪得明星賽周3分賽冠軍，已經要數到01年，而對上一次參賽就係06年。雷阿倫今次最大勁敵，好可能係佢嘅塞爾特人隊友皮雅斯，皆因「真理」係上季冠軍得主。
不過，各大莊家就唔多睇好皮雅斯可以衞冕成功，因為喺今屆6位參賽者中，皮雅斯今季嘅3分球命中球數最少，僅入75個。博彩網站SBOBET就列出皮雅斯奪標賠率為7倍，與杜利胡禮並列最冷，至於雷阿倫就係頂頭大熱，奪標賠率僅得2.7倍。
技巧賽方面，昨日公布最後5人參賽名單，除早被聯盟規定參賽嘅「蜂王」基斯保羅之外，戴歷羅斯、史堤芬居里、約翰禾爾及韋斯布克則獲球迷投票選出。5人之中只有戴歷羅斯在09年贏過冠軍，不過當年成績只屬一般，以35.3秒完成賽事，而賽前最佳成績係迪倫威廉士喺08年以25.5秒完成。