湖人慘遭貓噬
近況再度下滑嘅湖人，昨日作客惡戰剋星山貓，由於主將高比拜仁帶病上陣，嚴重影響發揮，相反山貓就保持對湖人有超水準演出的慣例，整場命中率高達5成以上。最終山貓大炒上季總冠軍湖人109比89，近10次對賽贏足8次，名副其實係湖人嘅頭號剋星！
近10對壘贏第8次
湖人上場輸畀魔術攻不銳、守不穩，賽後被傳媒大肆抨擊，估唔到面對實力更弱嘅山貓亦毫無改善。湖人上半場完結後僅落後6分，但第3節完全守唔住山貓嘅快速反擊，被對手將分數拋離，湖人最終慘敗20分，吞下2連敗之餘，亦係今季輸得最甘嘅一戰。湖人啞火，多少因為高比拜仁受感冒菌困擾，賽前高比仔已缺席操練，雖然佢堅持帶病上陣，但表現嚴重失準，全場起手20次僅中8球得20分，而失誤次數更高達5次，難怪佢賽後都冇面見人，並冇接受訪問就匆匆上咗球隊大巴。
毫無疑問，山貓已成了湖人近季頭號剋星，兩軍近10次對賽中，山貓贏出8次，而山貓自加盟NBA後，對湖人總成績為8勝5負，食住呢支上季總冠軍。山貓今場有謝勒華萊士打出「雙雙」20分同11個籃板球，佢賽後表示球隊憑跑動去減低對手高度優勢，另外亦成功壓制高比拜仁取分，成為贏波關鍵。
佐敦會禪師不談公事
另方面，山貓班主米高佐敦今場亦有到場督師，佢賽前就與恩師湖人教練積遜寒暄一番，當記者問到「禪師」季後會否到夏洛特襄助佐敦教山貓時，積遜就表示兩人冇談公事，並指出對方已經有位好教頭，意味「禪師」無意出掌山貓。湖人聽朝會對包尾大幡騎士，如無意外應該唔會3連敗嘅。（廣東體育周四早上8時30分直播）
本報綜合報道