早前賀歲波決賽在香港歷史性上演「中超打吡」，天津泰達贏廣州恒大捧盃，香港球迷一直對中超波頗為抗拒，但波男近期同老友傾起呢場波，原來唔少人已經開始對中超改觀，球員用心比賽，球賽自然好睇，可見中國足協之前所做嘅一連串行動，已經收到成效。
中國足協兩年前大改革，掃黑掃賭雷厲風行，而且唔係拍烏蠅咁簡單，而係真真正正打瓜咗好多隻大老虎，國足同國奧隊亦重新起步，將中國足運全面洗底，行番正軌。
早幾年中超實在太多假波同黑哨，搞到被央視封殺，但經過大清洗後，新中超已經翻生，依家嘅中超聯賽已經唔同以前，電視台都陸續做番直播，始終足球喺內地好受歡迎，除咗睇英超意甲，中超都有好大市場。
中超回復健康，各隊組軍就更加積極，據稱廣州恒大今年嘅班費高達六億人仔，佢哋個巴西外援穆里奇大家都喺賀歲波見識過，日前球隊又以三千萬人仔收購柏迪遜前鋒施奧，雖然聽起上嚟好似好多錢，但中超市場龐大，六億人仔唔會倒落鹹水海，只要球隊有料到交到成績，自然會取得高回報，樂觀啲睇，中超再過三五年，話唔定有力衝出亞洲架！
波男