香港隊作客到馬來西亞踢國際熱身賽，結果淨吞兩蛋，多年以來，香港足球水平都好過馬來西亞，七年前嘅世盃外圍賽更主客兩回合都擊敗對方，今次港足輸波而回，真係要認真檢討。
對於港足今次遠征馬來西亞所發生過嘅事，波男一直有留意，今次輸波，球迷將矛頭指向飛馬國援鄧景煌，話失第一球完全係佢失誤所致，叫佢以後唔好踢波，但其實將責任推晒落一個人身上，係好唔公平。
香港水平一直好過對手，不過呢啲已經係以前嘅事，馬來西亞最近喺東南亞錦標賽捧盃而回，實力冒升，今次約港隊拍跳，擺明要試陣同攞威，對於港隊嚟講，今次之行係一場硬仗。
港足又點備戰呢？去年七月起港隊有長期集訓，每周一課，亞運結束後增加到每周兩課，但可惜效果麻麻，主要原因係有個別球隊球員只到不操，甚至有球員到場逗留幾分鐘即閃，港隊練波長期唔夠人，點會練得好？
除咗個別甲組會唔支持，傑志亦向波男投訴，話港隊訓練編排混亂，球員無所適從，佢哋話，傑志兵近半年都好支持港隊，但傑志兵卻不受重視，歸根究柢，都係教練並非以操練出席率嚟決定陣容，好似今次對馬來西亞，鄧景煌冇乜點練波，但竟然正選上陣，咁嘅安排點會踢得好？
波男