尋日收到消息，今年ＮＢＡ明星賽將唔會舉行「H-O-R-S-E」投射賽，相信原因都係得一個，實在太悶啦！其實「H-O-R-S-E」嘅玩法就好似我細個所玩嘅「O-U-T」一樣，模仿對手投籃，佢喺罰球線射入就要跟番喺罰球線投射，唔入就會陸續得到O、U及T，儲齊晒咪就要OUT囉！
但老實講，「H-O-R-S-E」呢類遊戲唔算好玩之餘，亦唔算好睇，所以連續兩年負責籌劃比賽嘅ＴＮＴ電視台已經證實，今年洛杉磯明星賽將會取消已舉行兩屆嘅「H-O-R-S-E」投射賽，意味呢項賽事就只得兩屆盟主杜蘭特贏過。
無疑近年明星賽嘅節目已愈見失色，好似入樽賽缺乏球星參賽，動作又冇新意，令收視屢見下滑。不過阿裕就有個好提議，ＮＢＡ不妨試下喺明星賽加入「1 On 1」大賽，邀請聯盟各大「街波王」正面交峰，賽制就好似一啲歌唱及跳舞比賽咁玩PK淘汰賽，若然球迷能欣賞到高比拜仁單挑勒邦占士，肯定話題不絕。
有線ＮＢＡ評述員蔡芳裕