ＮＢＡ交易截止日愈見逼近，安東尼轉會消息又再頻生，《ＥＳＰＮ》指湖人已經決定加入「甜瓜爭奪戰」，呢支上季總冠軍打算用培訓多年嘅中鋒拜林作為籌碼，向金塊換取安東尼。
基於湖人今季表現略為跌Watt，不但暫時被馬刺搶走西岸一哥位置，就連「老二」個位都被小牛搶去，所以球會高層早前透露有意在交易截止日前增強實力。據《ＥＳＰＮ》報道，湖人已經與金塊商討交易安東尼嘅可能性，並願意將被譽為奧尼爾二世嘅中鋒拜林送走，以換取「甜瓜」加盟。
由於安東尼老早表明無意與金塊續約，而最後交易日會在本月25日截止，故金塊已無甚討價還價本錢。要知道最有機會得到安東尼嘅紐約人，只願以韋遜贊特拿及一個首輪選秀權作交易，所以獲得拜林自然較吸引。再者預計「甜瓜」亦樂意在洛杉磯生活，皆因「紫金兵團」有能力令佢取得冠軍指環之餘，佢老婆上年亦在洛杉磯置業，相信安東尼會願意續約加盟湖人。
事實上，高比拜仁今年已經32歲，湖人亦係時候準備為佢尋找接班人，而安東尼的確有能力擔此重任，所以送走近年傷患頻頻嘅拜林並不可惜。據悉湖人還有意增強控衞位置，目標可能係速龍嘅加特朗或騎士嘅莫威廉士，所以湖人有可能拉攏多一支球隊與金塊作三方交易。
另方面，明星賽「三分賽」參賽名單已出爐，雷阿倫將會挑戰衞冕嘅隊友皮雅斯，而「得分王」杜蘭特、騎士嘅吉遜、熱火嘅占士鍾斯及勇士嘅杜利胡禮將會參加。
本報綜合報道