騎士拚盡負小牛
今季失去「大帝」勒邦占士嘅騎士，昨日力拚至最後關頭，仍以96比99不敵小牛，常規賽連輸25場，刷新NBA史上單季最長連敗紀錄！不過騎士都唔能夠氣餒，皆因再輸兩場嘅話，就會刷新美國4大聯賽史上最長連敗紀錄，到時就真係羞家到貼地！
拚到最後3分飲恨
為避免成為「NBA史上最長連敗球隊」，騎士全隊今場都算搏到盡，在賽事中一度落後15分之下，第4節曾追至平手，可惜安東尼柏加在最後關頭射失3分波，令球隊未能追平打加時，最終以3分飲恨。騎士無奈寫下25連敗，刷新紀錄成為史上最長連敗球隊。
主將占美臣賽後表示：「冇人會想成為這紀錄嘅保持者，但我哋都知道現在我哋已經寫入歷史冊，現在只好向前看，盡快爭取久違嘅勝利。」
如再輸兩場更羞家
事實上，騎士的確要避免再輸，皆因喺美國4大體育聯賽NFL、MLB、NHL及NBA中，史上最長嘅連敗紀錄係26場，分別由NFL球隊海盜喺1976/77球季，以及MLB球隊陸軍上校在1889年所創出，若然騎士再輸一場就會平紀錄，輸兩場就會獨霸呢個恥辱性紀錄，都咪話唔肉酸！騎士聽朝將在主場面對活塞，之後就喺主場鬥快艇，對手均非強隊，只要自己生性，應該有機會贏番場止血。
本報綜合報道