李娜於澳洲網球公開賽功虧一簣，不敵「女泰山」克莉絲塔絲，屈居亞軍，但已創造中國人至亞洲網球手於大滿貫單打最佳成績，難怪好多人都指李娜聲勢已趕過劉翔。
香港傳媒鍾意叫李娜做娜姐，同偉大嘅周秀娜一樣係阿姐。兩位娜姐都有其過人之處，波男簡單地將其歸納為兩大類：好球技與高ＥＱ！
球技毋須多講，兩位都係超級阿姐，但高ＥＱ至係波男最欣賞嘅原因。香港娜姐出道時背負「o靚模始祖」之名，遭衞道之士抨擊，去大學做一個普通座談，竟然惹嚟全城口誅筆伐，盡顯香港社會的荒謬與無知。但娜姐面對群眾壓力，唔會發癲摑人幾巴，反而以溫柔與微笑攻勢，化解所有誤會與嘲諷，其ＥＱ之高，比起香港好多乜局物局議員都要高出幾皮，個人認為佢將來大有從政潛質，當年意大利小電影女王競選做國會議員，曾經轟動全球，香港娜姐大可做其接班人。
李娜作為新娜姐，同樣顯示出高強ＥＱ，決賽力戰而敗後，非但能掩蓋失望心情，更落落大方地盛讚「阿金」克莉絲塔絲，之後更發揮超強幽默感，笑老公雖然着得肉酸，但始終最鍾意都係佢，換來滿場掌聲，論賽後感言，娜姐直情贏晒「阿金」，抵佢得到「五支火柴」代言人合約。
以往有唔少外國人持錯誤觀念，話中國人欠缺風度及幽默感，但娜姐今次澳網表現，完全打破此陳腐觀念。娜姐近年南征北討，周遊各國，真正與世界接軌；香港娜姐雖然困於港灣，仍能自強不息，走出一條星光大道。波男幾時都話女人萬歲，兩個娜姐萬歲。