熱火送騎士40負
早前因為「報應論」搞到「現眼報」嘅「大帝」勒邦占士，尋日再遇母會騎士，受過教訓嘅「大帝」今鋪知驚，賽前受訪收斂一貫傲氣，仲祝福母會，但正所謂落場無父子，占士仍領熱火在主場以117比90大破騎士，客隊連輸21場，亦成為今季NBA首支「40負」球隊。
「大帝」再度面對舊東家騎士，自然成為賽事最大焦點，但占士今次就唔敢再挑釁騎士球迷，受訪時更改口祝福母會：「對於騎士，我唔會說任何壞話，而且我會向球隊及球迷送上祝福，畢竟我哋曾經一同奮鬥，度過咗唔少美好時光。」
不過失去「大帝」嘅騎士，如今已淪為聯盟中頭號魚腩，開賽後已大幅落後，熱火在首節領先15分，一直打得非常輕鬆，雖然在第三節初段，騎士曾追貼至只有4分之差，但此時熱火再度發力，完三節後已拉開17分優勢，提早進入垃圾時間下，熱火最終大勝27分。
騎士一月錄得全敗
熱火今場以韋迪表現最佳，取得34分、7個籃板、5次助攻及3次搶截嘅全面數據，而主角「大帝」就僅上陣31分鐘攻入24分及交出8次助攻。騎士輸波後，整個一月錄得全敗，成為NBA近20個球季內，第三支單月全敗嘅球隊。此外，騎士已連輸21場，現時成績為8勝40負，最諷刺係騎士在上季成為最快達到「40勝」球隊，但只係短短一季，就逆轉為聯盟最快「40負」球隊，認真羞家。
