波總多年來成日畀人鬧黑箱作業，仲有就係閂埋門鬼打鬼，近期由波總聘請嘅改革顧問已經完成報告，準備喺四月開大會。波男計過，到時要湊夠八十票以上先夠票通過，主席拜仁梁隨即提出妙計，就係到時以記名方式投票，邊個支持，邊個反對，咁就清楚晒嘞。
波總沿用多年嘅選舉方法，其實都算公平，現時嘅管治班底亦係由呢個制度產生，但係今次波總大改革，關乎本地波發展前途，就要取得四分三大比例票數先可以通過。即係話只要有超過四分一票反對，成件事就前功盡費。
波總秘書處資料所見，現時有投票資格嘅屬會共有五十三個，每間屬會兩票，即係一百零六票，要取得四分三通過，就要八十票之多，要咁多間屬會取得共識有一定難度。
五十三個屬會當中，有幾多人支持，邊個反對改革，實在難以估計。為解決呢個難題，拜仁梁就話今次會以記名方式投票，作用不言而喻。拜仁梁個主席位置係透過選舉產生，當然知道好多外人唔知嘅事，「彈弓手」、「兩頭蛇」相信佢都見唔少，由於以往係用不記名方式投票，經常有參選人落敗都唔知邊度出問題。
波總今次改行記名投票，波男相當贊成，仲希望波總以後繼續採用，皆因時代唔同，波總要落實改革，第一步就係自己增加透明度。
波男