【本報綜合報道】李娜奪得澳網女單亞軍後，豐厚獎金獎品陸續有來，除獲得約850萬港元亞軍獎金，賽後再獲「五支火柴」垂青，成為名錶Rolex勞力士形象代言人，贊助費當然和味，但最重要係盡顯「貴婦娜」嘅國際地位。
勞力士係澳網、法網同溫網官方計時，專搵頂尖網球手做代言人，個個都係天王天后，最出名嘅係費達拿，佢2006年簽訂一份十年合約，報酬高達1,500萬美元（約1億1700萬港元），條件只係要求費天王出席頒獎禮時戴番隻「蛋」，呢啲錢真係易賺。
天后級球手方面，軒寧、禾絲妮雅琪、伊雲娜域都係勞力士代言人，伊雲娜域去年嘅贊助費，保守估計高達300萬美元（約2,340萬港元），李娜以中國網球手身份當上勞力士代言人，中國市場咁龐大，其代言費肯定唔嘢小。
項目：男單 冠軍：祖高域（塞爾維亞） 亞軍：梅萊（英國）
項目：女單 冠軍：克莉絲塔絲（比利時） 亞軍：李娜（中國）
項目：男雙 冠軍：卜拜仁（美國）米克拜仁（美國） 亞軍：布柏菲（印度）柏斯（印度）
項目：女雙 冠軍：杜高（阿根廷）彭妮達（意大利） 亞軍：艾珊妮嘉（白俄羅斯）姬莉蘭歌（俄羅斯）
項目：混雙 冠軍：尼斯達（加拿大）施里博妮（斯洛文尼亞） 亞軍：漢尼（澳洲）詹詠然（中華台北）