銀牌決賽喎，波男當然有入場觀戰啦！而昨日最令波男感動嘅，就係見到有唔少球迷揸住收音機收聽電台直播。而呢次亦係電台N年來首次再度開咪現場直播本地球賽。記得幾年前香港地好流行「集體回憶」呢個詞語，而電台直播講波，就完全係包括波男在內上幾代本地波粉絲嘅集體回憶！
或者你會話，喺呢個外國高水準球賽直播氾濫嘅年代，呢種冇畫更冇高清慢鏡重播、單靠大氣電波發聲講波嘅做法已經Out到唔恨，但波男就咁睇，第一：電台肯花資源開咪搞直播，起碼就係對支持本地足運嘅一種表態；第二雖然本地波水準唔高係事實，但你話冇需求就假嘅，起碼好多揸搵食車嘅司機球迷，或者好多開緊工入唔到場又唔方便睇電視嘅朋友，相信佢哋都會好樂意透過收音機聽吓直播波嘅。
一星期七日一百六十八個鐘頭中，電台用咗幾多時間嚟播流行曲，相信唔使啲乜嘢統計，大家都知佢哋對本地樂壇非常「十卜」，咁一星期撥番三幾個鐘嚟播番一兩場波，都唔算過分吖？電台呢次播波只屬試驗性質，會唔會長搞仲未知，目前只係講咗嚟緊賀歲波會添食！不過無論如何踏出咗呢一小步，總好過原地踏步！
波男