自從卡塔爾奪得2022年世盃主辦權後，呢個西亞海灣國家已成為全球談論焦點，佢哋現正舉辦亞洲盃決賽周，似乎係向世人展示舉辦大賽嘅能力，但亞洲盃同世盃係兩回事，大家思前想後，愈諗愈多問題，近日更被傳媒揭發國際足協內部正為此而吵大鑊。
其實卡塔爾奪得世盃主辦權全因錢作怪，嗰啲「推廣足運、畀西亞一次機會」只係門面話。卡塔爾申辦團表明可以解決沙漠天氣問題，喺比賽同練習場館安裝冷氣，最頂癮嘅係有權投票嘅廿二個委員事前冇諗清楚就投畀卡塔爾，依家至發現好多技術問題，佢哋做嘅或者會係一個超錯嘅決定。
國際足協內部鬼打鬼，首先上演就係將卡塔爾世盃由六、七月改到一月，據聞ＦＩＦＡ會長白禮達、歐洲足協會長柏天尼同埋凱撒大帝碧根鮑華等巨頭有一番爭論，但當然係冇結果。
試想吓，一月點踢世盃？莫非到時全球主流聯賽全部暫停一個月咩？另一邊廂，曾有人反建議卡塔爾，將部分賽事安排喺其他海灣國家舉行，由幾個西亞兄弟國家合力搞世盃，一齊開心吓。
但卡塔爾就表明睬你都傻，仲話有信心搞掂一切問題，所以唔改期，亦唔改地點。呢場大龍鳳係十一年之後嘅事，睇嚟真係好戲在後頭！
波男