公民Babe現身109段 陪你撐到行
今季公民力圖洗脫「老餅」形象，大搞市場推廣同公關宣傳，球隊打入銀牌決賽後，幕後團隊立即做嘢，經過面試挑選，終於選出四位靚女模特兒，化身啦啦隊今午入場打氣，分別係Eagle、Crztal、Debby同Wing，佢哋今日將會喺109段集合，支持愛隊。樣子清秀嘅Crztal笑說，今次係佢咁大個女第一次入球場睇波，心情好興奮，為求睇得更投入，佢已經背熟晒公民全隊嘅資料，邊個打邊個都認得晒，天文台指今日天氣會再凍，但聽聞109段看台有太陽曬住，咁就唔怕凍啦！
自己友記住着綠衫
Eagle一早就將要記嘅資料背得爛熟，佢仲提醒大家，如果你係支持公民，記得穿戴綠色衣物入場，坐埋一齊為球隊打氣。
講咗咁耐，到底公民嘅幕後宣傳團隊係乜嘢來歷？拆穿咗其實好簡單，係由公民幾位華將兼任，黃耀富、羅振邦同謝德謙都孭住「市場發展主任」嘅銜頭，佢哋除咗踢波，仲要幫球隊搵生意，今次決賽搵到四位靚女幫拖，都算做到嘢啦！