本地波要繼續爆棚

青衣場出現爆棚盛況，球場邊天橋「免費位」都企咗百幾人，確係值得高興，可見本地波並唔係冇觀眾，只要戲碼夠吸引，地區球場根本唔夠用。

呢場爆棚波係聯賽盃八強賽事，南華對屯門，兩支無論入座率同票房都有一定保證嘅球隊對壘，僅可容納一千五百人嘅青衣場邊夠坐？只係香港環境特殊，地區球場容量就係咁多，本地波安排落區，早就預咗觀眾席唔夠用。

其實本地波周遊各區已經有一個半球季，等到今日先至出現一場爆棚波，比預期已經遲咗。以現時本地球市狀況，一場波只要戲碼吸引，二、三千觀眾捧場並唔係難事，只要各大班主繼續用心搞，吸引多啲球迷入場，就會有更多爆棚波出現。