本地波擁躉新年最佳節目就係睇省港盃，雖然港足輸波而回，但係唔緊要，因為仲有次回合主場反勝嘅機會，兩年前港足都試過反勝捧盃，希望今次都係一樣創造奇迹！
講得好聽就係奇迹，波男坦白啲咁講，其實即係等運到！數番轉頭，港足近兩年的確創造唔少奇迹，例如兩年前省港盃首回合落後一比三，次回合返主場反勝四比一捧盃，之後東亞盃壓倒北韓出線，跟住又有東亞運傳奇奪金，最近又喺廣州亞運殺入十六強，創五十二年來最佳戰績。
創咁多奇迹又點？只要大家睇睇近兩年來，連最基本嘅練波場地問題都解決唔到，就真係唔到你唔洩氣。睇番今屆省港盃港足嘅練兵場地，馬鞍山、跑馬地、晒草灣，嚟緊仲要去青衣，每次操練都要用唔同場地，有時有得用真草場，但更多時候係要用仿真草，操練時段仲要調嚟調去，打熱身賽唔使球證鳴笛完場，因為一夠鐘場地管理職員就會趕你走！
呢種「走鬼式」操練幾十年如一日，香港足球員已經習慣晒，早幾年港足喺城門谷練波嗰陣，更發生過遭管理人員驅趕嘅事情，但幸好隊員們都能忍辱負重，繼續為港出力，波男有時真係覺得， 我哋港足其實似游擊隊多過足球隊！
波總向政府爭取港足固定訓練場地，近期已經冇再提，「鳳凰計劃」亦冇再講，兩大賽事奧運同世界盃外圍賽今年殺埋身，「港足游擊隊」又要準備，新一年港足願望，就係大家一齊望天打卦，再等奇迹出現啦！
波男