長城遷離休斯敦!?

姚明淪為休斯敦火箭棄將！由於「移動長城」姚明腳踝部位再度出現應力性骨折，今季唔使預佢，其所屬球會火箭將送走呢位効力八年嘅鐵膽忠臣，以換取健康球員增強本錢衝擊季後賽。據悉現時有多達五至六支球隊對姚明感興趣，主要因為「小巨人」嘅合約將在明年夏天屆滿，到時就可以騰出大量薪酬空間，重組球隊。

今次交易消息由《雅虎體育》記者率先發放，其後再獲得《CBS體育》及休斯敦等媒體證實。據悉火箭將與五至六支球隊商討交易姚明嘅可能性，其中《休斯敦紀事報》更爆火箭已接觸帝王及山貓，交換交易方案。火箭目標非常明確，球隊希望在交易中換得具潛質嘅年輕球員，既能加強實力衝擊季後賽之餘，又可間接重組。

受傷姚明之所以具吸引力，主要係其合約將在明年夏天屆滿，雖然姚明年薪高達1770萬美元（約1.38億港元），但由於傷患問題，有800萬美元薪金會由保險公司支付，所以獲得姚明嘅球會，下季只需付出少許代價，就能清洗高達1770萬美元薪酬空間。

不過，帝王已拒絕火箭要求交易新秀卡辛斯，而山貓亦不願送走穆罕默德及戴奧等內線球員，所以談判仍在膠着中。不過火箭總裁莫雷已揚言，在交易截止日前一定會為火箭增添新兵，而頭號目標就係多支球隊都想擁有嘅「甜瓜」安東尼，以及萊爾及基斯保羅等，唔排除姚明會登陸金塊及拓荒者等西岸球隊。

至於火箭尋日則在主場以100比93擊敗巫師，可惜兩大中國球星姚明及易建聯都因傷缺陣，但阿聯表示下半場有慰問姚明，並指佢精神好好。另方面，一張疑似係姚明前隊友法蘭斯嘅吸食大麻相片，日前在網上流傳，有傳因為佢染上毒癮，才遭北京首鋼踢走。

本報綜合報道