山貓日前宣布與老帥拉利布朗「分手」，阿裕睇到呢單新聞都幾心酸，話晒呢位千勝教頭上任後將「山貓變鳳凰」，助球隊擺脫魚腩部隊污名外，上季仲歷史性領軍打入季後賽，如此良帥竟然都「打完齋唔要和尚」？搞乜呀米高佐敦！
無疑米高佐敦喺球員時代戰績輝煌，堪稱籃球之神，但佢退役後改任球會高層或老細後，其決策及眼光都叫阿裕不敢恭維。如今季先後作出多個令人摸不着頭腦嘅決定，包括放走主力贊特拿及費頓都令阿裕覺得大錯特錯。身高七呎一吋嘅贊特拿有身高有活力，今季轉投小牛後，隨即解決後者中鋒積弱嘅老問題，大大增加小牛爭勝本錢。
至於放走費頓就更加愚蠢，呢位廿六歲控衞近年表現穩定，而且佢身價根本唔高，紐約人提供畀佢嘅年薪亦只係七百萬美元，可惜佐敦一意孤行讓其品牌代言人之一嘅奧古斯甸上位，結果成績咪一落千丈囉。
依家連良帥拉利布朗都走埋，我認為山貓今季都幾難再入季後賽，所以倒不如炒走一啲高薪冗員，嚟一次清洗重組！但首要條件係米高佐敦唔好再亂咁嚟，得閒落場睇吓波咪算囉！
前香港隊中鋒蔡芳裕