【本報綜合報道】上周車路士對曼聯嘅聯賽大戰因天氣惡劣取消，據英國傳媒報道，呢場波有可能會被推遲至五月至進行補賽，如果屬實，呢兩支擂台躉明年五月會喺十日內兩度交鋒，隨時係決定今屆英超盟主誰屬嘅關鍵兩戰。
「車曼戰」上周取消之後，賽會已經着手擇日再賽，但由於兩軍賽程同樣插針都插唔入，消息指比賽或會改於下年五月舉行。
曼聯將於五月七日主場對車路士，十日後雙方或會再喺史丹福橋補賽，兩場大戰嘅戰果將決定今季英超冠軍誰屬。據英國《太陽報》分析，如果曼聯同車路士兼顧英超、歐聯及英足盃三線作戰，四至五月有機會要踢十五場波，真正考驗球員體力。英超賽會巨頭近日開大會，希望妥善安排補賽日期，發言人表示：「我哋會同球會密切協商，盡快定出補賽日。」