【本報綜合報道】巴塞隆拿最近獲「卡塔爾基金會」巨額贊助，未來5年進帳1億5千萬歐元，勢估唔到因此竟惹禍上身！事緣雙方達成贊助協議後，以色列傳媒發動全國「反巴塞」行動，皆因「卡塔爾基金會」疑同恐怖組織有聯繫，巴塞同佢合作，等同出賣全球猶太人，據報連以色列政府都出面施壓，要求巴塞中止贊助計劃！
巴塞隆拿喺以色列有大量粉絲，但球會宣布同「卡塔爾基金會」合作後即時引起公憤。西班牙《世界報》指出，「卡塔爾基金會」一直有提供資金畀恐怖組織，更係回教激進組織哈馬斯嘅經濟支柱，而哈馬斯正係以色列嘅最大威脅。
以色列報章《晚報》周一表明，若巴塞唔放棄合作，不但失去全球猶太人支持，佢哋亦會發起全國性「反巴塞」行動，報章聲明表示：「我哋要求好簡單，就係巴塞立即中止贊助計劃！否則我哋會組織以色列人民，焚燒巴塞波衫、頸巾、旗幟同一切有關呢間球會嘅物品！」《晚報》同時喺Facebook開設群組收集支持，誓要令巴塞就範。
除咗傳媒反應激烈，以色列政府亦按捺不住，派出外交官同巴塞官方接洽，希望球會取消同「卡塔爾基金會」合作。《晚報》指出，「卡塔爾基金會」係「普慈會」成員之一，而「普慈會」已被歐、美視為恐怖組織，故質疑巴塞贊助嘅合法性，睇怕巴塞今勻可能見財化水嘞！