曼城老細文梳亞使出3大絕招，結果說服王牌射手泰維斯留隊！泰維斯早前公開表示要離開曼城，文梳亞覺得冇咗佢唔掂，親自欽點主席阿姆巴拉克出面斡旋。後者為避開其貪錢經理人，親身到訓練場同泰維斯談心，除確認其「太上王」地位外，仲承諾繼續買人爭標，而且又畀佢返阿根廷探女，終用誠意打動「野獸」留隊。
雖然泰維斯好唔畀面，冇同球會商量就向外公報離開，但佢加盟曼城後表現實在太出色，加上其「拚命三郎」打法深得球迷愛戴，所以文梳亞願意認低威，絞盡腦汁想留低呢位阿根廷前鋒。
佢首先派其左右手，球會主席阿姆巴拉克同行政總裁曲克親自出面游說，球會深信今次「離隊事件」始作俑者，係泰維斯個經理人祖拉基安，後者出名見錢眼開，為從中抽佣不惜狂向「野獸」落藥，勸佢離開曼城。阿、曲二人為避開祖拉基安，靜靜雞趁泰維斯練緊波時候搵佢，以免祖拉基安從中作梗。
泰維斯早前曾拒絕電話談話，但今次兩大巨頭親自駕到，佢再冇迴避理由。據講阿、曲二人動之以情，話球會好需要「野獸」，堅決唔畀泰維斯下月離開；佢哋話曼城好有爭標野心，本季最低限度要打入英超前四參加下屆歐聯，並會繼續增兵爭聯賽錦標，而泰維斯就係當中最重要人物，球會將以佢為重心買人，肯定其「天王」地位。
另外，兩大巨頭亦明白佢掛住兩個女係人之常情，應承如果賽程許可，唔會阻止佢返阿根廷探女，真係畀足面子。泰維斯聽後條氣順晒，話自己本身都好鍾意曼城，依家得到球會肯定，決定收番離隊決定，繼續為「藍軍」賣命。其實泰維斯今次要求離隊其中一條導火線，係同領隊文仙尼不咬弦，但後者不但未有乘勢將佢踢走，仲主動向高層話泰維斯係好球員，落到場永遠貢獻百分百努力，並提議高層親自挽留泰維斯，可以話係「以德報怨」。
本報綜合報道