熱火連輸小牛14場
熱火近年對親小牛都輸波，估唔到有「弗爆三巨頭」坐鎮，仍難抗宿命！熱火尋日挾12連勝之勢兼擁主場之利下，仍以96比98輸波，連續14次不敵小牛。「大帝」勒邦占士成了今場輸波罪人，全因佢手風欠順，上半場竟捧蛋未得分，佢賽後亦大表失望。
賽前造出12連勝佳績嘅熱火，開賽後未見嘗到甜頭，尤其係「大帝」占士手感奇差，開賽後連番施射不中，並且受到犯規次數困擾，所以上半場捧蛋。占士對上一次在上半場一分未得，已經要追溯到07年11月，恰巧當時對手又係小牛。
魯域斯基突破8千籃板球
「大帝」下半場回復功力，但小牛喺第四節表現較穩定，尾段時刻嘅命中率較對手高，最終熱火窮追下仍負2分，結束12連勝。小牛主將魯域斯基攻入全場最高26分，另搶得9個籃板球，令佢職業生涯嘅籃板球數字突破8,000大關。占士今場攻入19分及搶得10個籃板球，但《ESPN》將佢評分列為C-，因球隊最需要佢嘅時候卻毫無表現，占士賽後亦對自己表現感到非常失望。
本報綜合報道