睇好格芬終非池中物

眾所周知NBA近年盛產後衞，單睇近5屆最佳新秀獎，有４人都屬後衞（基斯保羅、萊爾、戴歷羅斯及泰拉基伊雲斯），已知具潛質嘅低位球員並唔多。

不過今季肯定彈出一個，就係快艇上季新秀狀元格芬，阿裕睇完佢上場對公牛嘅表現，阿裕夠膽寫包單，佢一定會係NBA明日之星！

渾身是勁嘅格芬於該場比賽中充分顯示其全面打法，高位投射準繩、低位強攻冇人能阻，仲有連番表演力量型「鋤樽」，簡直睇到人血脈沸騰！從格芬喺場上嘅表現，令阿裕看到三位NBA傳奇球星嘅影子，其低位半勾手恍如鄧肯；中距離準繩度好比「郵差」卡爾馬龍，至於籃板雙手大力入樽，就似十足當年同米高佐敦鬥得你死我活嘅「惡漢」巴克利。只要格芬今季健健康康，阿裕認為佢可以力壓今季狀元爺約翰禾爾，打破近年傳統，以一名內線球員捧走最佳新秀寶座。