湖人送走寶娃男友
今次三方交易可謂各取所需，火箭希望加強後衞力量，於是以一個2012首輪選秀權，從籃網換來泰倫斯威廉士，呢位23歲球員上年以第11位被籃網揀中，首季平均交出8.4分、4.5個籃板及2.9次助攻，但由於佢紀律麻麻，早前曾被籃網放逐到NBDL打波，最終亦要執包袱。至於湖人則送出胡查錫及一個2011首輪選秀權到籃網，換來老將祖史密夫，削走胡查錫後，湖人可節省超過400萬美元嘅奢侈稅。
另丹佛電視台指籃網與金塊已就交易安東尼達成初步協議，金塊接受籃網所提供嘅球員交換。但能否成功仍視乎安東尼會否續約，皆因若「甜瓜」堅持唔續約，籃網都只係換得一個只効力半季嘅安東尼，最終未必肯交易。